അനുമതി കാത്ത് 407 ചർട്ടേഡ് വിമാനങ്ങൾ; വരാനിരിക്കുന്നത് ഒന്നര ലക്ഷത്തോളം പ്രവാസികൾ

തിരുവനന്തപുരം: വിദേശത്തുനിന്ന് സംസ്ഥാനത്തേക്കുവരാൻ അനുമതി കാത്തുകിടക്കുന്നത് 407 ചാർട്ടേഡ് വിമാനം. ഇതോടെ ഗൾഫിൽനിന്നടക്കം ഒന്നേകാൽലക്ഷത്തോളം പേർകൂടി തിരികെയെത്തും.

മടങ്ങിയെത്തുന്നവരിൽ 64 ശതമാനം പേരും തിരുവനന്തപുരം, കൊല്ലം, തൃശ്ശൂർ, എറണാകുളം, മലപ്പുറം, കോഴിക്കോട്, കണ്ണൂർ എന്നീ ഏഴു ജില്ലകളിൽനിന്നുള്ളവരാണ്. ഈ ജില്ലകളിൽ ക്വാറന്റീൻ നടപടികൾ ശക്തമാക്കാൻ സർക്കാർ തീരുമാനിച്ചു. തദ്ദേശസ്ഥാപന അടിസ്ഥാനത്തിൽ ആവശ്യമായവർക്ക് നിരീക്ഷണകേന്ദ്രം ഒരുക്കാനും മറ്റുള്ളവർ വീടുകളിൽ കഴിയുമ്പോൾ ക്വാറന്റീൻ ലംഘനമില്ലെന്നുറപ്പാക്കാനും തദ്ദേശസ്ഥാപനങ്ങൾക്കും പോലീസിനും നിർദേശം നൽകി.

മുന്നൂറോളം ചാർട്ടേഡ് വിമാനങ്ങൾ ഉടനെത്തുമെന്നാണു കരുതുന്നതെന്ന് ചീഫ് സെക്രട്ടറി വിശ്വാസ് മേത്ത സർക്കാരിനെ അറിയിച്ചു. ഇതിൽ അമ്പതിനായിരത്തിനും ഒരുലക്ഷത്തിനുമിടയിൽ ആളുകളെയാണു പ്രതീക്ഷിക്കുന്നത്. വിമാനം വരുന്നതിന് മൂന്നുദിവസം മുമ്പുമാത്രമാണ് യാത്രക്കാരുടെ പട്ടിക അതത് എംബസികൾ സർക്കാരിനു കൈമാറുക.

തിരിച്ചെത്തുന്നവരിൽ 64 ശതമാനം സ്ത്രീകളും പ്രായമായവരും കുട്ടികളുമടങ്ങുന്ന ദുർബല വിഭാഗമാണ്. ഇവരെ വിമാനത്താവളങ്ങളിൽത്തന്നെ ദ്രുതപരിശോധനയ്ക്ക് വിധേയമാക്കുന്ന കാര്യവും പരിഗണിക്കുന്നുണ്ട്. തിരിച്ചെത്തിയവരിൽ യു.എ.ഇ., സൗദി, കുവൈത്ത്‌, ഖത്തർ എന്നിവിടങ്ങളിൽനിന്നെത്തിയവർക്കാണ് രോഗബാധ കൂടുതൽ.

ഇതിൽ 665 പേർ ഐസൊലേഷനിലാണ്. വിദേശത്തുനിന്നെത്തിയവരിൽ 3692 പേർ ഗർഭിണികളായിരുന്നു. ഇതിൽ 34 പേർ കപ്പൽമാർഗമെത്തിയവരാണ്. 1480 പേർ വയോജനങ്ങളും 4507 പേർ പത്തുവയസ്സിൽ താഴെയുള്ള കുട്ടികളുമായിരുന്നു. പ്രവാസികളുടെ ഈ അനുപാതംകൂടി കണക്കിലെടുത്താണ് ക്വാറന്റീൻ നടപടികൾ ത്വരപ്പെടുത്തുക.

*നാട്ടിലെത്താൻ 5.59 ലക്ഷം പേർ*

വിദേശത്തുനിന്നും രാജ്യത്തിനകത്തുനിന്നുമായി ഡിസംബർവരെ നാട്ടിലെത്താൻ 5,59,125 പേർ നോർക്കയിൽ രജിസ്റ്റർചെയ്തിട്ടുണ്ട്. ഇതിൽ 40,653 പേരാണ് വിദേശത്തുനിന്ന് രജിസ്റ്റർചെയ്തത്.

മൊത്തം രജിസ്റ്റർ ചെയ്തവരിൽ പാസിന് അപേക്ഷിച്ചവർ 4,29,060 പേരാണ് (പ്രവാസികൾ-38,165). ഇതിൽ 3,79,032 പേർക്ക് പാസ് അനുവദിച്ചു (പ്രവാസികൾ-38,165).

*🛬വന്ദേഭാരത് മിഷൻ*

എത്തിയ വിമാനങ്ങൾ 218

യാത്രക്കാർ 53,545

കപ്പൽവഴി എത്തിയവർ 1621

*നോർക്കയിൽ രജിസ്റ്റർചെയ്ത് ഇതുവരെ വിദേശത്തുനിന്ന് നാട്ടിലെത്തിയവർ-36,200*

കോഴിക്കോട്-4704

മലപ്പുറം-4690

കണ്ണൂർ-4547

തൃശ്ശൂർ-3820

എറണാകുളം-2972

തിരുവനന്തപുരം-2819

കൊല്ലം-2715

പാലക്കാട്-2037

കാസർകോട്-1834

ആലപ്പുഴ-1790

കോട്ടയം-1664

പത്തനംതിട്ട-1654

വയനാട്-511

ഇടുക്കി-443

(എംബസികൾവഴി മാത്രം രജിസ്റ്റർചെയ്തും ചാർട്ടേഡ് വിമാനങ്ങളിലും വന്നവർ പുറമേ)

*എത്തിച്ചേർന്ന പ്രവാസികൾ (പ്രധാന രാജ്യങ്ങൾ. നോർക്ക കണക്കുകൾപ്രകാരം)*

ദുബായ്-9297

അബുദാബി-5222

മസ്‌കറ്റ്-3960

കുവൈത്ത്‌-3419

ദോഹ-2948

മനാമ-2610

മാലി-1601

റിയാദ്-1325

ജിദ്ദ-1180

ദമാം-991

സലാല-912

റാസൽ ഖൈമ-507

ലണ്ടൻ-465

ക്വലാലംപുർ-357

സിങ്കപ്പൂർ-317

ലാവോസ്-295

മോസ്‌കോ-247

മെൽബൺ-228

റോം-173

പ്രദേശികൾ വാർത്തകൾ വാട്സപ്പിൽ അറിയാൻ ഇവിടെ ക്ലിക്ക് ചെയ്യുക: